Дэлхийн банкнаас Монгол Улсын 2022 оны эдийн засгийн тайланг өнөөдөр танилцууллаа.

Монгол Улсын эдийн засаг 2022 онд 4.7 хувиар өссөн бол уул уурхайн салбарын олборлолт болон экспорт тэлж байгаатай холбоотойгоор энэ онд 5.2 хувиар өсөх төлөвтэй байна хэмээн дүгнэжээ. Цар тахлын үеийн уналтаас хойш Орос Украины мөргөлдөөн, хүнсний бүтээгдэхүүний үнийн өсөлт зэрэг амаргүй сорилтуудтай үед эдийн засаг сэргэж байгаа нь сайн боловч энэ бүрэн гүйцэд сэргэлт биш гэдгийг Дэлхийн банкны ахлах эдийн засагч Хосе Лүйз Диаз Санчез тодотгов.

Тэрбээр, Эдийн засгийн сэргэлт нь 2022 онд төсвийн орлого дорвитой өсөхөд нөлөөлсөн. Энэхүү орлого экспортын өсөлт болон хөдөлмөрийн зах зээлд сэргэлт гарсантай холбоотой. Төсвийн зардал 2021 онтой харьцуулахад тодорхой хэмжээгээр буурсан. Төсвийн зардал 2021 онд ДНБ-ий 35 хувьтай тэнцэж байсан бол энэ үзүүлэлт 34 хувь болж бага зэрэг буурлаа. Гэвч төсвийн зардал цар тахлын өмнөх үетэй харьцуулахад өндөр хэвээр байна.