Улаанбаатар хотын нийтийн тээвэр шинэ автобусаар парк шинэчлэл хийж байна. Үүний хүрээнд зарим өөрчлөлт хийж буйгаа хотын дарга Х.Нямбаатар танилцуулав. Тэрбээр нэгдүгээр сарын 20-ноос нийтийн тээврийн зургаан шинэ чиглэл нэвтрүүлэхээр болсныг мэдээллээ. Тодруулбал,
- М1 чиглэл Таван шараас офицеруудын ордон
- М2 чиглэл Зунжин худалдааны төвөөс Сүхбаатарын талбай
- М3 чиглэл Нисэхээс Сүхбаатарын талбай
- М4 чиглэл Шар хаднаас III, IV хорооллын эцэс
- М5 чиглэл Ботаникаас Хермес худалдааны төв
- М6 чиглэл Шинэ 100 айлаас ТЭЦ III гэсэн үндсэн зургаан чиглэлийг нэмэхээр төлөвлөжээ.
Мөн тойрог хэлбэрийн найман чиглэл нэмэхээр төлөвлөж байгаа аж.
Улаанбаатар хотын хаана ч амьдарч байгаа иргэн хамгийн ихдээ гурван автобус дамжиж, очих цэгтээ хүрэх боломжтой байдлаар тооцсон хэмээн хотын дарга хэллээ. Зорчигчдын дамжин суулт нэмэгдэх хэдий ч зорчилтод зарцуулах хугацааг 10-30 хувиар буурна гэж тооцоолсон байна.
Дашрамд дурдахад, нийслэлийн нийтийн тээврийн үйлчилгээнд 110 чиглэлд 1017 автобусаар өдөрт 400000-500000 зорчигчид үйлчилгээ үзүүлж байна.
