Жүдо бөхийн Дэлхийн Аварга Шалгаруулах Тэмцээн (ДАШТ) Катарын Доха хотод гурав дахь өдрөө үргэлжилж байна.

Эмэгтэйчүүдийн -57 кг жинд ОУХМ Л.Энхрийлэн хүрэл медалийн төлөө Солонгосын бөх Ха Мимитэй барилдаж нэмэлт цагт торгуулиар ялж ДАШТ-ий хошой хүрэл медальтан боллоо. Тэрбээр өнгөрсөн жилийн ДАШТ-д хүрэл медаль хүртэж байсан юм.

Өнөөдөр эрэгтэйчүүдийн -73 кг жинд Б.Эрдэнэбаяр эхний тойрогтоо Израилийн бөх Тохар Бутбулд, Ц.Цогтбаатар гуравдугаар тойрогт Алжирын залуу бөх Дрист нэмэлт цагт торгуулиар ялагдсанаар тэмцээнээ өндөрлүүлэв.

Мөн эмэгтэйчүүдийн -57 кг жинд М.Ичинхорлоо Тайваны бөх Лиен Чен Линд эхний тойрогт ялагдсанаар тэмцээнээ дуусгасан юм.

Өчигдөр эрэгтэйчүүдийн -66 кг жинд ОУХМ Ё.Басхүү хүрэл медалийн төлөө Гүржийн бөх Маргвелашвили Важатай барилдаж нэмэлт цагт вазари үнэлгээ авч ялснаар ДАШТ-ий хос хүрэл медальтан болсон юм.

Маргааш эрэгтэйчүүдийн -81 кг жинд ОУХМ Г.Болор-Очир Катарын бөх Ребахи Халилтай 15:00 цагаас барилдана.