Жүдо бөхийн дэлхийн цуврал тэмцээн Тбилисийн их дуулга Гүрж улсад энэ сарын 22-д эхлэх бөгөөд дэлхийн 83 орны 557 тамирчин оролцоно. Тэмцээнд Монголын шигшээ багийн 12 тамирчин зодоглохоор бүртгүүлсэн байна.
Гүржийн нийслэлд дэлхийн чансааг тэргүүлэгч Канадын Кристиа Дегучи, Катерин Бушмин-Пинар, Жессика Климкайт Нидерландын Санн Ван Дике, Гүржийн Лаша Бекаури, Косовогийн Дистриа Красники, Лаура Фазлиу Хорватын Барбара Матич зэрэг шилдгүүд цуглажээ.
Гурван өдөр үргэлжлэх тэмцээнд О.Цэцэнцэнгэл, Л.Энхрийлэн тэргүүтэй тамирчид барилдах бөгөөд 4 эрэгтэй, 8 эмэгтэй жүдоч оролцох юм байна.
