Япон Монголын дипломат харилцаа тогтоосны 50 жилийн ойн хүрээнд Япон Улсын Токушима дах Монгол Улсын Өргөмжит консул, Соёлын элч Каваүчи Широ сангийн санаачилгын дагуу “Cүүн зам” бүжгийн наадмыг Улаанбаатар хотноо энэ сарын 22-ны өдөр зохион байгуулах гэж байна. Энэ талаар "Сүүн зам" бүжгийн наадмын зохион байгуулагч Д.Болор-Эрдэнэ "Наадамд Япон Улсын парламентын гишүүн Ямагүчи Шүничи, Ямазаки Масаяасү, Токүшима мужийн дэд захирагч, мөн Анан хотын захирагчаар ахлуулсан албаны болон бизнес, соёл, урлаг, спортын 170 орчим төлөөлөгчид хүрэлцэн ирж оролцоно.Бүжгийн “Парад наадам”-аар Япон орны ардын урлаг, өв соёлын нэг болох “Ава одори”, “Ёсакой” бүжгийн урлагаас танилцуулахын зэрэгцээ Монголын үндэсний болон орчин үеийн бүжгийн тоглолтыг хамтран зохион байгуулж байгаа юм" гэлээ. Наадмын ерөнхий зохион байгуулагчаар “Хүн гэр театр”, “СУИС”-ийн Бүжгийн Урлагийн Сургууль, хамтран зохион байгуулагчаар нийслэлийн Аялал жуучлалын газар ажиллаж байна. Тус бүжгийн наадам нь Монгол Улсад анх удаагаа зохион байгуулагдаж байгаагаараа онцлог болно.
